Örleikritahátíð Garps!

Örleikritahátíð Garps!

Laugardaginn 30. apríl næstkomandi ætlar Íþróttafélagið Garpur að halda litla leikritahátíð á Brúarlundi í Landsveit. Sýnd verða 4 frumsamin verk eftir félaga úr leikhópi Garps.

Húsið opnar klukkan 15.30 og gleðin hefst svo stundvíslega klukkan 16.00! Miðaverð eru litlar 1000 kr. fyrir fullorðna, 500 fyrir 11-16 ára og frítt fyrir 10 ára og yngri.

Boðið verður upp á léttar veitingar fyrir og eftir sýningarnar og í hléi. Minnum á kaffisjóðinn!

Gestir athugið að koma klæddir eftir veðri, ein sýningin er útisýning.

Sjáumst hress og kát!

Íþróttafélagið Garpur.

Íþróttamenn ársins 2010

Á páksabingói foreldrafélags Laugalandsskóla þriðjudaginn 19. apríl voru veittar viðurkenningar fyrir bestan árangur á árinu 2010. Þeir sem hlutu viðurkenningar voru:

Margrét Harpa Jónsdóttir fyrir frjálsar íþróttir

Eiður Helgi Benediktsson fyrir glímu

Ómar Högni Guðmarsson fyrir borðtennis

Því miður var Ómar Högni Guðmarsson ekki viðstaddur en hann mun fá sinn bikar afhentan síðar.

Að auki var valinn íþróttamaður ársins hjá Garpi og var það Eiður Helgi Benediktsson sem hreppti bikarinn að þessu sinni, hann var að vonum glaður eins og meðfylgjandi myndir sýna:-)

Kristinn Guðnason glímuþjálfari sendi skemmtilega umsögn um Eið Helga, sem lesin var upp við þetta tækifæri, og birtist einnig hér að neðan. 

"Eiður Helgi Benediktsson, keppti á 4 mótum á liðnu ári og árangur á þeim er 2.sæti í 5.bekk á Grunnskólamóti HSK.  Fjórða sæti í 10-11 ára á héraðsmóti HSK. Fyrsta sæti eða fjórðungsmeistari 10-11 ára á Fjórðungsglímu Suðurlands.  Fyrsta sæti, Íslandsmeistari 10-11 ára í þyngdaflokki +42kg á Meistaramóti Íslands.  Hann mætir vel á æfingar og tók góðum framförum á árinu.  Eiður er öflugur glímumaður og leggur viðfangsmenn sína oft á eiginn bragði eða sækir á þá sniðglímu."

Fjölþrautarmót Dímonar og Garps

 

Sæl verið þið

Næstkomandi mánudag þann 18. apríl verður haldið árlegt frjálsíþróttamót í íþróttahúsinu á Hvolsvelli.

Mótið er nefnt „Fjölþrautamót Dímonar og Garps“.

 

Keppni hefst kl. 15.00 á mánudaginnog stendur í u.þ.b tvær klukkustundir.

Keppendur fá sérstök viðurkenningaskjöl þar sem árangur er skráður.

Strax eftir keppni verður keppendum boðið uppá grillaðar pylsur og djús.

 

Strákar keppa sér og stelpur keppa sér.  Allir eru velkomnir til keppni.

 

Keppt er í eftirfarandi flokkum:

 

8 ára og yngri:

Skutlukast.

35 metra spretthlaup.

Langstökk án atrennu.

 

9 – 10  ára:

Skutlukast.

35 metra spretthlaup.

Langstökk án atrennu.

 

11 – 12  ára:

Kúluvarp.

35m spretthlaup.

Langstökk án atrennu.

Hástökk

 

13 – 14  ára:

Kúluvarp.

35m spretthlaup.

Langstökk án atrennu.

Hástökk

 

15 – 16  ára:

Kúluvarp.

35m spretthlaup.

Langstökk án atrennu.

Hástökk

 

Með von um góða þátttöku

Stjórn frjálsíþróttadeilda Dímonar og Garps

 

Íþróttadagur Garps

Íþróttafélagið Garpur ætlar að halda þrjá íþróttadaga til reynslu fyrir yngstu börnin, það er leikskólaaldurinn og 1.-3. bekk.

Fyrirkomulag Íþróttastundanna verður með þeim hætti að íþróttasalurinn á Laugalandi verður opinn fyrir  foreldra og börn til leikja frá kl 16-18.

Ekki er ætlast til að börnin komi ein heldur er hér um samverustund foreldra og barna að ræða.

Garpur hefur fengið úthlutað eftirfarandi föstudögum: 8. apríl, 15. apríl og 29. apríl.

Einnig verður sundlaugin opin til reynslu líka þessa daga frá kl 16-19. 

 

Vonumst til að sjá sem flesta!!

Lottóauglýsing!!

Auglýsing fyrir Lottó.

 

Lottó er 25 ára á árinu og í tilefni af því er Íslensk getspá að vinna að nýrri auglýsingarherferð. Ein auglýsingin hefst á því að maður fer inn í verslun og kaupir sér lottómiða og labbar síðan út á götu. Ætlunin er að fylla götuna af íþróttafólki á öllum aldri sem þakkar fyrir stuðninginn síðustu 25 ár.

 

Stefnt er að því að taka auglýsinguna upp laugardaginn 9. apríl eða sunnudaginn 10. apríl. Ef veður verður óhagstætt þá daga færist upptakan yfir á helgina 16. og 17. apríl.

 

Íþrótta- og Ólympíusamband Íslands leitar til íþróttafélaga innan ÍSÍ að safna saman hópi af íþróttafólki frá sínu félagi til þess að taka þátt í auglýsingunni. Markmiðið er að fá um 400 manns til að mæta.

 

Íþróttafólkið þarf að vera á staðnum í 4 – 6 klst, en stefnt er að því að upptakan fari fram frá 10:00 – 20:00 á þeim degi sem verður fyrir valinu.

 Hópurinn má vera blanda af stelpum og strákum 10 ára og eldri eða einhver flokkur innan félagsins sem hefur áhuga á að mæta.

 

Nánari upplýsingar hjá Hörpu Rún í síma 8685196.

Starfskraftar Garps.

Kæru Garpar!

Íþróttafélagið Garpur hefur nú síðan 1992 staðið fyrir öflugu forvarna-og íþróttastarfi. Mikið er byggt á sjálfboðavinnu og hafa margir lagt hönd á plóginn í gegn um tíðina.

Nú eru uppi hugmyndir um að létta þjálfurunum okkar - sem bera hitann og þungann af starfinu - lífið, með stofnun hóspins „Starfskraftar Garps“.

Í þann hóp er öllum frjálst að ganga sem hafa löngun og áhuga fyrir því að styrkja Garp með störfum sínum, t.d.  sem starfsmenn á mótum, bílstjórar o.fl.

Hópsfélagar verða birtir með nafni og símanúmeri á síðunni www.garpsfrettir.blog.is, og geta þá þjálfarar leitað þangað eftir þeirri aðstoð sem þeir þurfa.

Fátt er jafn skemmtilegt og gefandi og íþrótta-og tómstundastarf, svo ekki sé talað um samveru foreldra og barna í slíku starfi.

Hægt er að skrá sig í hópinn og fá nánari upplýsingar með því að senda póst á netfangið [e-mail] eða í síma 8685196 (Harpa Rún) og 8974884 (Guðrún)

Styrkjum nú Garpinn okkar, börnin okkar og samfélagið okkar, og skemmtum okkur konunglega í leiðinni.

Stjórn Garps.

Leiklistarnámskeið

Minnum á leiklistarnánskeiðið á morgun, mánudaginn 21. mars kl 20:00 á Laugalandi og hafa með sér 1000,- í fyrsta tímann

Aðalfundur Garps. Fréttatilkynning.

Aðalfundur Íþróttafélagsins Garps var haldinn fimmtudaginn 25. febrúar síðast liðinn. Mætti voru 13 manns og fundarstjóri var Engilbert Olgeirsson.

Formaður síðustu 6 ára, Jóhanna Hlöðversdóttir, lét af störfum og við keflinu tók Harpa Rún Kristjánsdóttir. Áfram sitja í stjórn Guðrún Arnbjörg Óttarsdóttir gjaldkeri, Herdís Styrkársdóttir ritari, meðstjórnendur eru Karen Engilbertsdóttir og Óðinn Burkni Helgason og Friðgerður Guðnadóttir, Kristinn Guðnason varamaður. Ólafur Logi Guðmundsson var kosinn fulltrúi nemenda og Margrét Heiða Stefánsdóttir og Margrét Rún Guðjónsdóttir varamenn.

Á fundinum komst ýmislegt til tals, meðal annars hugsanlegar lagabreytingar í félaginu, þjálfaramál, skemmtilegar leiðir til fjáröflunar og fleira. Rætt var um gott samstarf þjálfara og stjórnar við tengilið nemenda sem setið hefur í stjórn Garps undanfarið. Skýrsla stjórnar var flutt og ársreikningur borinn upp til samþykktar. Fram kom að mikil sókn er í frjálsum íþróttum. Einnig var á dagskrá fyrirhugað leiklistarnámskeið á vegum félagsins sem og svokallaður Íþróttadagur yngri barna á Laugalandi.

Fulltrúar úr 7. og 8. bekk Lauglalandsskóla komu fram með mjög góðar tillögur að nýjum keppnisbúningi í frjálsum, sem verið er að skoða.

 

**Leiklistarnámskeið Garps**

Dagana 21.,23., 28., og 30. mars næstkomandi mun Íþróttafélagið Garpur standa fyrir leiklistarnámskeiði fyrir krakka í 6. til 10. bekk og jafnvel þá sem eldri eru :)

Á námskeiðinu verður farið í ýmsar gerðir spuna og leiktækni æfinga til skemmtunar og fróðleiks. Meðal annars verður stuðst við „Líkamlegt leikhús“ Growtowskis og fleira.

Um er að ræða kvöldnámskeið sem fara mun fram á mánudags og miðvikudags kvöldum frá kl. 20 – 22..., á Laugalandi, ofangreinda daga.

Gjald fyrir námskeiðið er 1000 krónur á mann. Greiðist í fyrsta tíma. ATH að þetta er gjald fyrir alla 4 tímana. Ekki er hægt að koma inní námskeiðið eftir fyrsta tímann.

Skráning í síma 8685196 eða í fyrsta tíma.

Allar nánari upplýsingar eru hjá leiðbeinanda námskeiðsins, Hörpu Rún Kristjánsdóttur í síma 8685196 eða á netfangið [e-mail].

Holl hreyfing, skapandi skemmtun, hópefli og hamingja :) Fjölmennum og skemmtum okkur frábærlega :)

Vertu Garpur til líkama og sálar!

Frjálsíþróttamót HSK á Hvolsvelli 5. mars

Héraðsleikar HSK í frjálsum fyrir keppendur 10 ára og yngri voru haldnir á Hvolsvelli laugardaginn 5. mars. Þar mættu fjöldi keppenda frá aðildarfélögum HSK og skemmtu allir sér hið besta. Allir fengu viðurkennignu fyrir þátttökuna. Hér eru nokkrar myndir af góðum görpum, fleiri myndir má sjá á HSK.is.