Framhalds-Aðalfundur!

Kæru félagar!

Fimmtudaginn 7. mars sl. var haldinn Aðalfundur Íþróttafélagsins Garps. Vegna afar dræmrar mætingar var stjórnarkosningum frestað og munu þær fara fram á Framhalds-Aðalfundi þann 19. mars nk.

Fundurinn fer fram á Laugalandi þriðjudaginn 19. mars kl. 19.00. Á sama tíma fer fram frjálsíþróttaæfing á vegum félagsins á sama stað og ættu því margir að geta nýtt ferðina á fundinn.

Garpur sinnir mikilvægu starfi í sveitarfélaginu og heldur úti fjölbreyttu íþróttastarfi, iðkendum sínum að kostnaðarlausu.Til að halda úti slíkri starfsemi er nauðsynlegt að félagið státi af öflugri stjórn. Nú óska margir stjórnarliða þess að láta af störfum og þörf er á nýjum starfsgörpum.

Við hvetjum alla foreldra, iðkendur og aðra velunnara til að láta sjá sig og hjálpa okkur að halda Garpi gangandi!

Stjórn Garps.

Frjálsar í stórsókn!

Góðir Garpar.

Nú er að ljúka mikilli frjálsíþróttatörn hjá krökkunum okkar allra. Helgina 23.-24. febrúar voru 7 Garpsstelpur að keppa á Meistaramóti Íslands 11-14 ára. Þær voru þar í liði HSK sem sigraði glæsilega í stigakeppni mótsins í fyrsta sinn. Þetta voru þær:

Jana Lind Ellertsdóttir (13 ára), Sigurlín Arnarsdóttir, Sóley Kristjánsdóttir, Jóhanna Sigrún Haraldsdóttir og Dagný Rós Stefánsdóttir (allar 12 ára), Hildur Jónsdóttir og Guðný Karen Oliversdóttir(báðar 11 ára). Þær stóðu sig allar mjög vel í einstaklingsgreinum og sumar einnig í boðhlaupum. Besta árangrinum náði Guðný Karen, 5. sæti í kúluvarpi.

Núna á laugardeginum 2. mars voru svo héraðsleikar HSK fyrir 10 ára og yngri haldnir á Hvolsvelli. Þar átti Garpur heila 14 keppendur sem gerði okkur að einu af fjölmennustu liðum mótsins, já við erum ekki alltaf lítil!!

Í flokki 8 ára og yngri var liðakeppni og kepptu Garparnir að sjálfsögðu saman sem eitt lið. Í því voru þau Sveinn Skúli Jónsson, Svanborg Jónsdóttir, Olgeir Otri Engilbertsson, Anna Ísey Engilbertsdóttir, Eiður Örn Reynisson, Sunna Hlín Borgþórsdóttir, Sumarliði Erlendsson, Edda Magnúsdóttir og Guðlaug Birta Davíðsdóttir. Í flokki 9 ára kepptu Aldís Freyja Kristjánsdóttir, Heiðdís Lilja Erlingsdóttir og Sigurður Mattías Sigurðarson. Og í flokki 10 ára þau Guðný Salvör Hannesdóttir og Kristinn Ásgeir Þorbergsson. Allir lögðu sig fram af alefli og mikill og góður liðsandi var í hópnum. Enginn í vafa þegar spurt var hverjir væru bestir!

Mig langar líka að nefna hlut foreldranna. Þar var hver á fætur öðrum tilbúinn að hjálpa til. Að keyra liðið til Reykjavíkur á laugardeginum þegar þjálfarinn komst ekki og svo að keyra yngri krakkana, starfa á mótinu og fylgjast með. Þetta er auðvitað ómetanlegt og hafið öll bestu þakkir mínar fyrir!

Það er gaman að starfa í þessu þegar áhuginn er svona mikill, foreldrarnir virkir og krakkarnir alltaf að bæta sig og vera sér og félaginu sínu til sóma! Allir með og ÁFRAM GARPUR!!

Halli Gísli.

 

 

 

AÐALFUNDUR GARPS 7. MARS kl 20:30

Við erum öll GARPAR til líkama og sálar 

Íþróttafélagið Garpur boðar til aðalfundur á Laugalandi fimmtudaginn 7. mars kl 20:30, á dagskrá eru venjuleg aðalfundarstörf.

Við hvetjum alla sem telja íþróttastarf barna skipta máli að mæta á fundinn og hafa áhrif á starf og framtíð Íþróttafélagsins Garps.

Stjórnin

Mótið í frjálsum íþróttum 6. janúar 2013

vaskir garpar mættu á mót í Laugardalnum á sunnudaginn var og létu til sín taka. Úrslit mótsins er að finna á http://mot.fri.is/cgi-bin/ibmot/urslitib2010D1.htm Garpur fékk 36 stig á mótinu. Jana Lind náði 2 sæti í spretthaupinu og 2 sæti í kúluvarpi. Sóley Kristjánsdóttir var í 3 sæti í kúluvarpi og Smári Valur í 3 sæti í kúluvarpi.

Þökkum görpum og þjálfara vasklega framgöngu á mótinu :-)

Æfing í frjálsum á fimmtudagskvöldið....

Vonum að garpar góðir hafi átt ánægjuleg jól og séu fullir tilhlökkunar að hreyfa sig og komast í form á nýju ári :)

Halli Gísli vill fá sem flesta á æfinguna núna á fimmtudagskvöldið 3. janúar, - það er þetta fína HSK-mót framundan í sjálfri höfuðborginni :-) æfing hefst kl 19:30.

Koma svooooooo..................

Innlit á æfingu í frjálsum......

Á þriðjudagskvöldið 4. desember voru foreldrar boðaðir á æfingu í frjálsum á Laugaland og tilefnið var að Halli Gísli ætlaði að veita viðurkenningar.  Myndir af æfingunni eru hér til vinstri á síðunni í albúmmi sem heitir Æfing Frjálsar des 2012. Vel var mætt og fengu Eiður, Gísella, Óli Bjarni og Margrét Rún viðurkennignu frá þjálfaranum fyrir ýmsa eiginleika, svo sem jákvæðni, metnað, hversu vel var farið eftir fyrirmælum og fleira. Ekki er annað að sjá en að þau séu ánægð með þetta garparnir! 

Til lukku efnilegu garpar!

Íþróttafélagið Garpur 20 ára

Sunnudaginn 25. nóvember fagnaði Íþróttafélagið Garpur í Rangárþingi ytra, 20 ára afmæli sínu í íþróttasalnum á Laugalandi. Harpa Rún Kristjánsdóttir formaður bauð gesti velkomna og Engilbert Olgeirsson stiklaði á stóru í sögu félagsins. Auk þess var sýning á verðlaunagripum, dúndrandi tískusýning á gömlum og nýjum Garpsbúningum, söngur, leikir, létt gaman og boðið upp á kaffi og meðlæti.
Garpur, íþróttafélag Land- Holta- og Ásahrepps var stofnað á Laugalandi 30. september 1992 og voru stofnfélagar 27. Síðan hefur Garpur náð að festa sig kyrfilega í sessi sem öflugt íþróttafélag í sveitinni og heldur úti æfingum iðkendum sínum að endurgjaldslausu. Í vetur er boðið upp á æfingar í frjálsum íþróttum, glímu, blaki, badmintoni, handbolta og fótbolta fyrir börn og unglinga. Að auki er haldið úti stubbaleikfimi fyrir yngstu iðkendurna og Garpar úr „eldri deildinni“ stunda blak af miklum móð. Frá upphafi hafa a.m.k. 227 manns keppt í nafni Garps.
Þrír „garpar“ voru heiðraðir þennan dag fyrir óeigingjarnt starf í þágu félagsins:
Guðni Guðmundson á Þverlæk, styrktaraðili Garps nr. 1, hefur á síðustu átta árum safnað saman nærri 400 þúsund drykkjarílátum og komið í endurvinnslu í nafni Garps. Hann hefur gengið langar vegalengdir með vegum innan sveitar og utan og nýtir þannig söfnunina sér til heilsubótar.
Kristinn Guðnason á Þverlæk, glímuþjálfari, hefur frá upphafi haldið utan um glímuæfingar félagsins og verið óþreytandi að mæta með unga glímugarpa á glímumót, oft með mjög góðum árangri.
Haraldur Gísli Kristjánsson í Hólum, frjálsíþróttaþjálfari, hefur hin síðari ár verið drifkrafturinn í öflugu frjálsíþróttastarfi en Garpur heldur úti æfingum nánast allan ársins hring. Margir efnilegir íþróttamenn hafa fetað sín fyrstu skref á frjálsíþróttaæfingum hjá honum.
Stjórn íþróttafélagsins Garps þakkar allar góðar gjafir er félaginu hafa borist og öllum sem glöddust með okkur þessa skemmtilegu dagsstund.

Myndir af afmælishátíðinni eru í albúmi hér á síðunni til vinstri :-)

Garpurinn tuttugu ára og afmælisfagnaður sunnudaginn 25. nóvember!

Ágætu foreldrar og forráðamenn.

Á því herrans ári 2012 fagnar Íþróttafélagið Garpur tvítugsafmæli sínu. Að því tilefni mun félagið standa fyrir afmælishátíð í íþróttasalnum á Laugalandi, sunnudaginn 25. nóvember næstkomandi.
Á dagskránni er meðal annars:
* Stiklað á stóru í sögu félagsins!
* Gamlar kempur heiðraðar!
* Dúndrandi tískusýning á tímalausum Garpsbúningum!
* Sagan rifjuð upp í gömlum gripum!
* Leikir og létt gaman!
* Kaffi og með því!
Garpur ætlar að leysa gesti sína út með gjöfum og gefa öllum íþróttabarmmerki. Einnig verða til sölu pinmerki með félagsmerkinu sem gaman er að skreyta jakkann sinn með. Enda erum við öll Garpar til líkama og sálar!
Fyrst og síðast er maður auðvitað manns gaman og þess vegna hvetur stjórn Garps sem flesta félaga, gamla og nýja sem og aðra velunnara félagsins til þess að gleðjast með okkur á þessum tímamótum.

Okkur langar að leita til ykkar foreldra um að baka fyrir Garpinn sinn, það má vera skúffukaka, kleinur eða pönnukökur.
Einnig eru allar hendur vel þegnar í að bera fram og ganga frá. Gunna í Grásteinsholti og Jóhanna frá Hellnum sjá um skipulagningu á kaffiveitingum og því er nauðsynlegt að láta þær vita hvort þið ætlið að leggja eitthvað til á kaffiborðið eða aðstoða við frágang og þess háttar í gsm símana 897 4884 (Gunna) og Jóhanna (847 5015) fyrir laugardaginn 24.11.2012.

Vonum að erindi okkar verði vel tekið og hvetjum ykkur til að koma á afmælisfagnaðinn á sunnudaginn kl 14:00.
Hlökkum til að sjá ykkur!

Rangæingamót í borðtennis!

Föstudaginn 19. október nk. (á

morgun) verður haldið Rangæingamót

í borðtennis. Mótið fer fram á Hellu og

hefst kl. 15.00

Um 10 garpar eru þar skráðir til leiks.

Við óskum þeim góðs gengis og

hvetjum foreldra og aðra til þess að

mæta og hvetja þá til dáða.

Stjórn Garps.

 

Æfingaskipulag haustmisseri 2012.

Æfingar Íþróttafélagsins Garps!

BLAK/BADMINTON fyrir 4.-10. bekk á mánudögum frá 15:00 - 16:00

GLÍMA fyrir alla bekki á þriðjudögum frá 15:00 – 16:30

FRJÁLSAR ÍÞRÓTTIR fyrir alla bekki á þriðjudögum frá 19:00 - 21:30. Yngri á undan og eldri á eftir.

FÓTBOLTI/HANDBOLTI fyrir alla bekki á miðvikudögum frá 15:00-16:30

STUBBALEIKFIMI fyrir yngstu Garpana á fimmtudögum frá 16:00 - 17:00

Góð mæting tryggir góða skemmtun