Fleiri endar!

Kæru Garpar! Nú eru til ennþá fleiri endar sem okkur býðst að fela til styrktar elsku félaginu okkar. Þessir eru staðstettir í Fosshólum og Sumarliðabæ.

Síðasta skipti gekk með eindæmum vel, þótt hendurnar hefðu vissulega mátt vera fleiri ;) 7 vaskir garpar földu einhver ósköp af endum og hann Pierre Davíð færði okkur svo yndislegt engjakaffi okkur til mikillar gleði.

Margar hendur vinna fislétt verk og að binda fyrir rúlluenda er hressandi útivera og góð skemmtun með fjölskyldu og vinum. Svona fjáraflanir eru það sem heldur félaginu okkar gangandi og er vonandi að sem flestir sjái sér hag og hamingju í að leggja hönd á þann plóg.

Með von um að rimpa þessu af og sjá um leið sem flest garpsandlit, gömul og ný :) Áhugasamir hafi samband við Hörpu Rún í síma 8685196.

Stjórn Garps :)

Bundið fyrir rúlluenda!

Jæja Garpar stórir og smáir. Mánudagskvöldið 25. júlí, annað kvöld, klukkan 20.00 ætlum við að reyna að fjölmenna og binda fyrir enda á nokkrum rúllum til styrktar félaginu okkar. Rúllurnar eru í Fosshólum og Þjóðólfshaga. Frekari upplýsingar má fá hjá Hörpu Rún í síma 868 5196.

Mætum nú sem flest, því þá tekur þetta enga stund, og styðjum við bakið á Garpinum okkar!

 

Fjáröflun!

Hæ Garpar!

Okkur hjá Garpinum hefur boðist að binda fyrir rúlluenda í fjáröflunarskini fyrir félagið. Um er að ræða rúmlega 1000 rúllur sem er ekki lengi gert þegar allir leggjast á eitt. Þessvegna væri alveg frábært ef sem flestir myndu sjá sér fært að hjálpa til og styrkja félagið okkar. Þeir sem hafa áhuga á að vera með hafi samband við Hörpu Rún í síma 8685196.

Margar hendur vinna létt verk!

Áfram Garpur!

Engin frjálsíþróttaæfing þriðjudaginn 12. júlí!

Garpar athugið!

Þriðjudaginn 12. júlí nk. Á MORGUN, fellur frjálsíþróttaæfingin á Brúarlundi niður. Í næstu viku, þriðjudaginn 19. verður hinsvegar æfing eins og venjulega.

Endilega hjálpiði til við að láta þetta berast!

Frjálsíþróttamótið á Selfossi

Nokkrir Garpar fóru á fjrálsíþróttamót á Selfossi um helgina og stóðu sig auðvitað vel að vanda. Hér eru nokkrar myndir af mótinu.

Hildur Jónsdóttir varð í 2 sæti í langstökki í sínum aldursflokki, Jóhanna Sigrún í 2. sæti í 60 metra hlaupi og langstökki, Jóhanna varð í 1. sæti í 800 metra hlaupi og Hildur í 2. sæti. Margrét Rún varð í 1. sæti í 100 metra hlaupi og 2. sæti í 80 metra grindahlaupi, 3. sæti í 800 metra hlaupi og 3. sæti í langstökki. Þá urðu Margrét Rún og dvergarnir í 2. sæti í boðhlaupi :-) Úrslit eru að finna á fri.is.  

Þátttekendur hefðu mátt vera fleiri og auðvitað vildum við að veðrið hefði verið betra, en þetta var mjög skemmtilegt og mætum galvösk að ári.

Íþróttahátíð HSK fyrir 14 ára og yngri 11 júní næstkomandi

 

27. Íþróttahátíð HSK verður haldin á Selfossi laugardaginn 11. júní og hefst kl. 10:00. Keppt verður í frjálsíþróttum í flokkum 14 ára og yngri. Í frjálsíþróttum verður keppt á héraðsleikunum, sem eru fyrir keppendur 10 ára og yngri og á aldursflokkamótinu, sem er fyrir 11 - 14 ára.

Vonast er til að fjölskyldur keppenda fjölmenni. tilvalið er að fara í útilegu á Selfoss, en hátíðin Kótelettan verður haldin á Selfossi þessa helgi. Góð tjaldstæði eru á staðnum og ýmis afþreying á svæðinu, sem hægt er að njóta fyrir eða eftir keppni á Íþróttahátíðinni.

Keppni hefst kl. 10:00 á laugardeginum og stendur til kl. 15:00. Keppendur mega keppa að hámarki í 5 greinum, auk boðhlaups. Þeim er ekki heimilt að keppa upp fyrir sig í aldri, nema innan sama móts, í þeim greinum sem ekki er boðið upp á í viðkomandi aldursflokki. Tímaseðil má sjá á mótaforiti FRÍ, á www.fri.is á næstu dögum.

 

Keppnisgreinar:

Aldursflokkamót HSK

Stúlkur og piltar 14 ára: 100 m hlaup - 800 m hlaup - 4x100 m boðhlaup - langstökk - hástökk - kúluvarp – spjótkast – 80m grindahlaup.

Stúlkur og piltar 13 ára: 100 m hlaup - 800 m hlaup - langstökk - hástökk - kúluvarp – spjótkast -80m grindahlaup.

Stúlkur og piltar 12 ára: 60 m hlaup - 800 m hlaup - langstökk - hástökk - kúluvarp.

Stúlkur og piltar 11 ára: 60 m hlaup - 800 m hlaup - langstökk - hástökk - kúluvarp.

 

Héraðsleikar HSK

Stúlkur og piltar 10 ára: 60 m - langstökk - kúluvarp - hástökk - 800 m.

Stúlkur og piltar 9 ára og yngri: 60 m – langstökk

 

Verðlaun á héraðsleikum og aldursflokkamóti

Verðlaunapeningar verða veittir fyrir þrjú fyrstu sætin í hverri keppnisgrein á aldursflokkamótinu í frjálsum. Á héraðsleikunum fá allir þátttakendur viðurkenningu fyrir þátttökuna. Veitt verður viðurkenning til stigahæsta einstaklings og besta afrek einstaklings samkvæmt stigatöflu á aldursflokkamótinu. Afreksstig eru samkvæmt venju miðuð við aldursflokk, en ekki fæðingarár keppenda. Einnig verður veitt viðurkenning fyrir sigur í stigakeppni félaga á aldursflokkamótinu.

Skráningarfrestur

Skráningarfrestur í keppnisgreinar á Íþróttahátíðinni er til kl. 23:00 fimmtudaginn 9. júní nk. Mikilvægt er að skila fyrir þann tíma. Garpskrakkar sem hafa áhuga á að skrá sig hafi samband við Halla Gísla í síma 896-9539.

Um að gera að fjölmenna! Áfram Garpur!

Frjálsar í sumar!

Þá eru frjálsíþróttirnar að komast af stað aftur eftir maí frí. Fyrsta æfing sumarsins er á morgun, þriðjudaginn 7. júní kl. 20.30 - 22.00 á Brúarlundi.Þetta er eina æfingin sem verður fyrir HSK mót 14 ára og yngri sem verður á Selfossi laugardaginn 11.júní. Svo það er sérlega mikilvægt að allir mæti og láti skrá sig niður.

Æfingar í sumar verða á þriðjudögum, á Brúarlundi á milli 20.30 - 22.00.

Sjáumst hress og kát!

 

Leikjanámskeið!!

Hið árlega leikjanámskeið U.M.F Ingólfs, Markihvols, Ásahrepps og Í.Þ.F Garps fyrir 6-12 ára verður að Laugalandi í 8 daga og byrjar miðvikudaginn 8.júní og endar 21. júní. Núna byrjar námskeiðið kl. 12.30 til 15.00.

Kennari verður Guðni Sighvatsson. Þáttökugjald er 5000 kr.

Skráning hjá Þresti í s. 487 8099/896 9968 eða Kjartani í s. 487 6532

Hvetjum alla krakka til að fjölmenna :)

Leikritahátíð Garps 29. apríl 2011

Laugardaginn 29. Apríl síðastliðinn hélt Íþróttafélagið Garpur sína fyrstu Örleikritahátíð. Um var að ræða einskonar uppskeruhátíð leikhóps Garps, sem varð til á leiklistarnámskeiði á vegum félagsins í mars síðastliðnum.

 

Á hátíðinni sem fram fór á Brúarlundi í Landsveit voru sýnd fjögur frumsamin verk eftir félaga í leikhópnum. Þetta voru verkin:

 

Ferðalagið mikla, eftir Bjarka Eiðsson, Brynjar Gísla Stefánsson, Karen Engilbertsdóttur og Rökkva Hljóm Kristjánsson.

 

Baðstofan, eftir Hörpu Rún Kristjánsdóttur.

 

Ráðgátan, eftir Margréti Heiðu Stefánsdóttur og Margréti Rún Guðjónsdóttur.

 

Skógarberjatoppur bragðbætt vatn án kolsýru, eftir Brynjar Gísla Stefánsson og Rökkva Hljóm Kristjánsson.

 

Hinir félagar leikhópsins og leikendur í verkunum voru þau: Aron Ýmir Antonsson, Annika Rut Arnarsdóttir, Fríða Hansen, Guðmundur Hreinn Grétarsson, Helga Þóra Steinsdóttir, Jónas Steingrímsson, Ólafur Logi Guðmundsson, Óttar Haraldsson, Sigrún Birna Pétursdóttir, Sigurður Smári Davíðsson, Tryggvi Kristjánsson og Viðja Atonsdóttir.

 

Leikritin voru sýnd á sviði og einnig fyrir utan Brúarlund. Í hléinu bauð svo leikhópurinn upp á heimabakað bakkelsi.

 

Á hátíðina mættu rúmlega 60 manns og var almennt mikil ánægja með daginn. Allur ágóði af hátíðinni rennur svo til Garps.

 

Garpur kann bestu þakkir öllum þeim sem lögðu hönd á plóginn við þetta verkefni, en það má segja að margar hendur hafi unnið létt verk.

 

Myndir af hátíðinn eru hér til vinstri í myndaalbúmi :-)

 

Kærar þakkir fyrir komuna:-)

Fjölskyldan á fjallið. Gíslholtsfjall

Eftirfarandi frétt barst okkur frá HSK. Við hvetjum alla Garpa til að taka þátt!!

 

HSK mun taka þátt í verkefninu fjölskyldan á fjallið líkt og undanfarin ár en verkefnið er nú haldið í 10. sinn.  HSK hefur alltaf tilnefnt tvö fjöll og eru fjöllin því orðin 20 að tölu. Gíslholtsfjall í Holtum og Bjarnafell í Ölfusi urðu fyrir valinu í ár. 

HSK mun standa fyrir fjölskyldugöngu á Gíslholtsfjall fimmtudaginn 19. maí nk. og hefst gangan kl. 19:00.  Göngustjóri verður Sverrir Kristinsson bóndi í Gíslholti.

Gísholtsfjall er grasi gróið fjall sem er 168 m.y.s. og er auðvelt uppgöngu.  Lagt verður af stað á fjallið skammt frá bæjarhlaðinu í Gíslholti, en bærinn stendur við fjallið. Best er að leggja bílnum innan túngirðingar, vegna hættu á lakkskemmdum (hross). Lausaganga hunda er bönnuð á svæðinu.

Til að komast að Gíslholtsfjalli er farið upp Landveg nr. 26 frá Landvegamótum og svo inn á Hagaveg  nr. 286, rétt áður en komið er að Laugalandi. Svo er beygt inn á Heiðarveg nr. 284 við Gísholtsvatn. Einnig er hægt að fara inn á Heiðarveg nr. 284   af þjóðvegi 1, rétt  austan við Þjórsárbrú. Þaðan eru 9 km að Gíslholti.  Gott útsýni er af fjallinu og sést vel til austurfjalla, láglendi Suðurlands og um uppsveitir.

HSK gangan á Bjarnafell verður síðan þriðjudaginn 31. maí nk. kl. 19:00 og verður nánar greint frá þeirri göngu hér í Sunnlenska þegar nær dregur.