Allir á Brúarlund!!

Sæl öll.

Nú verðum við öll að mæta á Brúarlund því nú þarf að skrá sig á íþróttahátíðina á laugardaginn!! Allir 14 ára og yngri mega keppa og við verðum að finna foreldra sem geta keyrt og starfað fyrir Garp á mótinu. Og svo er auðvitað ekki minnst gaman að horfa á Garpskrakkana standa sig frábærlega eins og alltaf :)

Sjáumst hress og kát klukkan 20.00 á þriðjudagskvöldið!

Halli Gísli

Mót framundan

Góðan daginn. Minnum á æfingu á Brúarlundi þriðjudagskvöldið kl. 20.00. Síðan er að styttast í íþróttahátíð HSK og hér fylgir með bréf frá HSK um það.

26.  Íþróttahátíð HSK í Þorlákshöfn  laugardaginn 26. júní nk.

26. Íþróttahátíð HSK verður haldin í Þorlákshöfn laugardaginn 26. júní n.k. og hefst kl. 10:00.  Keppt verður í  frjálsíþróttum í flokkum 14 ára og yngri. Í frjálsíþróttum verður keppt á héraðsleikunum, sem eru fyrir keppendur 10 ára og yngri og á aldursflokkamótinu, sem er fyrir  11 - 14 ára.   

Vonast er til að fjölskyldur keppenda fjölmenni, en tilvalið er að fara í útilegu í Þorlákshöfn þessa helgi. Góð tjaldstæði eru á staðnum og ýmis afþreying á svæðinu, sem hægt er að njóta fyrir eða eftir keppni á Íþróttahátíðinni.

 

Keppni hefst kl. 10:00 á laugardeginum og stendur til kl. 18:00.  Keppendur mega keppa að hámarki í 5 greinum, auk boðhlaups. Þeim er ekki heimilt að keppa upp fyrir sig í aldri, nema innan sama móts, í þeim greinum sem ekki er boðið upp á  í viðkomandi aldursflokki.  Tímaseðil má sjá á mótaforiti FRÍ, á www.fri.is  á næstu dögum.

 

Keppnisgreinar:

Aldursflokkamót HSK

Telpur og piltar 14 ára: 100 m hlaup - 800 m hlaup - 4x100 m boðhlaup - langstökk - hástökk - kúluvarp - spjótkast - 80m grindahlaup.

Telpur og piltar 13 ára: 100 m hlaup - 800 m hlaup - langstökk - hástökk - kúluvarp - spjótkast -80m grindahlaup.

Stelpur og strákar 12 ára: 60 m hlaup - 800 m hlaup - langstökk - hástökk - kúluvarp.

Stelpur og strákar 11 ára: 60 m hlaup - 800 m hlaup - langstökk - hástökk - kúluvarp.

 

Héraðsleikar HSK

Stelpur og strákar 10 ára: 60 m - langstökk  - kúluvarp - hástökk - 800  m.

Hnokkar og hnátur 9 ára og yngri: 60 m - langstökk

 

Verðlaun á héraðsleikum og aldursflokkamóti

100 ára afmælisverðlaunapeningar verða veittir fyrir þrjú fyrstu sætin í hverri keppnisgrein á aldursflokkamótinu í frjálsum. Á héraðsleikunum fá allir þátttakendur afmælisverðlunapening fyrir þátttökuna. Veittur verður bikar fyrir fyrir stigahæsta einstakling og besta afrek einstaklings samkvæmt stigatöflu á aldursflokkamótinu. Afreksstig eru samkvæmt venju miðuð við aldursflokk, en ekki fæðingarár keppenda. Einnig verður veittur bikar fyrir sigur í stigakeppni félaga á aldursflokkamótinu.

 

Skráningarfrestur

Skráningarfrestur í keppnisgreinar á Íþróttahátíðinni er til kl. 23:00 fimmtudaginn 24. júní nk. Mikilvægt er að skila fyrir þann tíma. Skráningar berist beint inn á mótaforritið á heimasíðu FRÍ, http://www.fri.is. Þeir sem hafa ekki fengið aðgangsorð geta fengið þær upplýsingar á skrifstofu HSK. 

 

Starfsmenn félaga

Samkvæmt nýrri reglugerð um héraðsmót í frjálsíþróttum skiptir stjórn frjálsíþróttaráðs greinum á milli þátttökufélaga og verður sú skipting kynnt um leið og skráningar liggja fyrir.

 

 

 Krakkar og foreldrar, skoðið þetta vel og fjölmennum svo á mótið, við eigum stóran hóp 14 ára og yngri ef allir geta mætt.

Kveðja Halli Gísli

 

Æfing í kvöld!

Takið eftir, takið eftir: Það verður frjálsíþróttaæfing á vellinum á Hellu í kvöld, strax eftir fótboltaleikinn. Stefnum á að byrja kl. hálf níu og vera til tíu. Líklega verður Jóhanna að þjálfa.

Baráttukveður, Halli Gísli

Frjálsar Íþróttir í sumar á Brúarlundi

Minnum á frjáls íþróttaæfingu á Brúarlundi þriðjudagskvöldið kl 20.00, vonumst til að sjá sem flesta.

 

 

Garps blakarar

Garpur er íþróttafélag fyrir alla og því nauðsynlegt að halda til haga að margir eru að stunda íþróttir fyrir félagið.

 

Á miðvikudögum eru Garpar að blaka í sveitablakinu svokallaða og nú hefur Kristín Hreinsdóttir í samstarfi við Kolbrúnu Sigþórsdóttur sett á stofn heimasíðu til að halda utan um starfið. Þær fóru um daginn á íslandsmóti í blaki kvenna og stóðu sig vel og hver veit nema hægt verði að draga karlana á mót, ég skal vera fyrstur í lið!

 

Endilega athugið..    sveitablak.weebly.com

Guðni

Frjálsíþróttaæfingar í sumar

Við frjálsíþróttadeild Garps höfum ákveðið að vera með æfingar í sumar. Æfingarnar verða að öllum líkindum á Hellu og verða 2 í viku á þriðjudögum og fimmtudögum. EKki er alveg búið að negla þetta endanlega niður en allar upplýsingar verða settar hérna inn á síðuna okkar :)

 Eins ákváðum við að við þjálfararnir myndum nota síðuna okkar miklu meira, þannig að hér munum við auglýsa æfingarnar og eins ef æfingar detta niður (sem við vonum auðvitað að gerist ekki) Eins set ég hérna inn upplýsingar um komandi mót og þá getið þið krakkað skráð ykkur hérna á síðuna með því að "kommenta". Eins myndum við vilja krakkar að þið látið vita hérna á síðunni ef þið ætlið að koma á æfingar, því það er svo auðvelt að skipuleggja æfingarnar ef við vitum hvað margir ætla að koma.

 

 En næsta mót er Meisaramót Íslands í frjálsum íþróttum (MÍ) fyrir 11-14 ára 12-13 júní. Þeir sem kepptu á MÍ síðast geta mætt og gott væri ef þið skráið ykkur hérna fyrir neðan. Við munum samt reyna að hafa samband við alla. Jóhanna mun fara með okkar krökkum á mótið sem haldið er í Kópavogi, en við þurfum líka lágmark 1 foreldri með líka. Við setjum svo inn síðar nánari upplýsingar um það mót.

 

Þá held ég að allt sé upptalið í bili !

-Bestu kveðjur, Jóhanna og Emilía ;)

HSK mót í blaki

 

Garpur tók þátt í HSK mótinu í blaki sem fram fór á mánudaginn síðasta. Keppendur voru 23 og kepptu í þremur flokkum.

 Í krakkablaki 5.1 (kasta og grípa) kepptu tvö lið og lentu í 3. og 4. sæti og stóðu sig vel. Bættu sig mjög þegar á mótið leið.

 Í krakkablaki 5.3  (uppgjöf, fleygur, grípa, smassa) kepptu tvö lið og lentu þau í 1. og 3. sæti. Glæsilegur árangur þar.

 Í unglingaflokki keppti eitt lið hjá drengjum og lentu þeir í öðru sæti á eftir Dímon í æsispennandi bráðabana.

 

Skemmtilegt mót þar sem krakkarnir stóðu sig vel.

 Laugardaginn 1. maí er svo aldursflokkamót HSK í sundi og mun Garpur senda fjóra keppendur og keppa í fyrsta sinn í langan tíma.

 

Guðni

Mót á Hellu á föstudag.

Góðan daginn.

Umf.Hekla ætlar að halda frjálsíþróttamót á föstudaginn fyrir 1.- 4. bekk. Okkur var boðið að vera með og það er auðvitað stemming fyrir því. Við höfum sagt frá þessu á síðustu tveimur æfingum og í gær(þriðjudag) voru u.þ.b. 10 krakkar sem vildu fara. Þrjú af þeim töluðu um að foreldrar gætu keyrt svo við ákváðum að vera ekki að reyna að fá rútu eða skólabíl. Vonandi er það rétt mat hjá okkur.

En mótið hefst á Hellu kl. 15.00. Keppt verður í þremur greinum, spretthlaupi, langstökki án atrennu og skutlukasti. Lengd mótsins fer auðvitað eftir keppendafjölda en það ætti alls ekki að þurfa að taka meira en tvo tíma, mesta lagi tvo og hálfan.

Vonandi getum við klárað veturinn með gleði þarna. Þeir sem sjá þessa síðu og eins þeir sem voru á æfingu síðast þurfa að vera duglegir að spjalla og þjappa sér saman í bíla. Ef vandamál koma upp með akstur má hafa samband við Halla Gísla (8969539), við gerum ekki vandamál úr því, við reddum því bara! Endilega mæta í Garpsgöllum og bolum þeir sem eiga svoleiðis.

Sjáumst á föstudag, kv. þjálfarar!

 

 

Blakmót á Hvolsvelli og fleira !!

Í dag fara Garpar á Blakmót á Hvolsvöll.  Mótið byrjar kl 15 og er búið kl 17.

Enn og aftur er komin sending af Garpsgöllunum, - þeir fást afhentir geng greiðslu hjá Guðrúnu í Giljatanga 3 (næst innsta húsinu). Nánari upplýsingar eru í síma 897 4884.

kv

Guðrún gjaldkeri

Íþróttamenn Garps

Á páskabingóinu sem haldið var þann 30. mars síðastliðinn, voru afreksmenn Garps í íþróttum heiðraðir, og eru þeir sem hér segir:

Íþróttamaður ársins: Guðrún Heiða Bjarnadóttir

Frjálsíþróttamaður ársins: Guðrún Heiða Bjarnadóttir

Badminton maður ársins: Gísli Gíslason

Glímumaður ársins: Árni Páll Þorbjörnsson

Borðtennismaður ársins: Einar Þorri Sverrisson

Þessir krakkar eru búin að standa sig frábærlega á liðnu ári og getum við svo sannarlega verið stolt af því að eiga margfalda íslandsmeistara í okkar röðum!

Með vissu um að þetta ár verði betra en það síðasta!

Jóhanna