Frjálsíþróttaæfingar

Frjálsíþróttaæfingar hefjast 2. október á Laugalandi, hlökkum til að sjá ykkur endurnærð eftir sólríkt sumar :-)

Æfingatafla vetrarins verður birt fljótlega :-)

Áfram Garpur!

Fyrsti endafeluleikur 2012

Fjöldi ungra garpa mættu við Fosshóla mánudagskvöldið 2. júlí kl 20:00 til að fela enda sem fjáröflun fyrir Garpinn sinn :-)  Mæting var með afburðum góð og tók það ekki nema tæpan hálftíma að klára að fela endana. Að loknu engjakaffi sem var í boði Fjallafangs fengum við lánaðan bolta hjá húsfreyjunni góðu í Fosshólum og skelltu garpar sér fótbolta. Mikið fjör var og barátta hörð sem endaði með jafntefli. Ekki létu garpar þar við sitja og fóru í útilegumannaleik og skemmtu sér hið besta. Þetta var því mjög skemmtileg kvöldstund og garpar rjóðir og sælir þegar heim var haldið. Stjórn Garps þakkar þessum vösku krökkum hjálpina og vonar að sjá þá aftur í næsta endafeluleik!

Endafeluleikur!

Kæru félagar!

Eins og þið öll vitið hefur Íþróttafélagið Garpur frá upphafi staðið fyrir fjölbreyttum æfingum fyrir félaga sína, þeim að kostnaðarlausu. Að sjálfsögðu þurfum við samt að standa straum af ýmsum kostnaði og hafa hinar ýmsu fjáraflanir gert okkur það kleift.

Nú er komið sumar og heyannir að fara af stað, og ætla Garpar, líkt og í fyrra að taka að sér að fela enda til styrktar félaginu sínu. Margar hendur vinna létt verk og því er mikilvægt að fjölmenna til starfsins.

Það er allra hagur að halda áfram öflugu starfi, og hér er gullið tækifæri fyrir iðkendur og aðstandendur þeirra að sýna stuðning í verki.

Frekari upplýsingar má nálgast hjá Hörpu Rún í síma 868-5196 eða á facebook. Hvetjum alla til að leggja hönd á plóginn!

Stjórn Garps.

 

Íþróttahátíð HSK

Góðan dag.

Langaði að deila með ykkur frábærum árangri keppenda Garps í Þorlákshöfn á laugardaginn! Við áttum 5 keppendur á aldursflokkamóti 11-14 ára. Það er skemmst frá því að segja að þau stóðu sig hvert öðru betur, náðu í heil 96 stig og vörðu með glæsibrag þriðja sætið sem Garpur náði á þessu móti í vetur. Aðeins stórlið Selfyssinga og heimamanna í Þór urðu fyrir ofan okkur. Þær Jóhanna Sigrún, Sóley og Dagný Rós gerðu sér lítið fyrir og unnu stigakeppni 11 ára stelpna og fengu 48 stig! Í flokki tólf ára stelpna náði Jana Lind í heil 27 stig á sínu fyrsta móti fyrir Garp og í flokki 14 ára stráka náði Guðjón Andri í 21 stig þrátt fyrir að vera nánast á annarri löppinni hálft mótið. Þvílíkir snillingar!!!

Svo má ekki gleyma keppendum okkar á héraðsleikum 10 ára og yngri. Þær Guðný Karen og Hildur fóru þar á kostum og voru meðal efstu manna í flokki 10 ára stelpna. Verður ekki leiðinlegt þegar þær verða 11 ára og fara að raða inn stigunum líka!

Að lokum, takk krakkar fyrir frábært mót, frábæra stemmingu og frábæra frammistöðu. Það eru forréttindi að fá að vera með svona hópi. Til hamingju Garpur!!

Kveðja Halli Gísli :)

ATH Frjálsíþróttaæfing!!!

Fimmtudagskvöldið 7. júní (á morgun) verður fyrsta frjálsíþróttaæfing sumarisins á Brúarlundi í Landsveit. Æfingin hefst kl. 20.30 og stendur til 22.00. Þjálfari verður Halli Gísli.

Frekari æfingar í sumar verða auglýstar síðar og hægt verður að fylgjast með því hér á síðunni.

Hvetjum sem allra flesta til að mæta!

Stjórnin.

Frjálsíþróttaæfingar á íþróttavellinum á Hellu!

Ungmennfélagið Hekla, Íþróttafélagið Dímon og Íþróttafélagið Garpur ætla að stnada saman að frjálsíþróttaæfingum á íþróttavellinum á Hellu í maí og júní í sumar.

Æfingarnar verða á þriðjudögum kl: 17.00-18.30 (Fyrsta æfing verður þriðjudaginn 22. maí).

Öllum er heimilt að mæta og taka þátt

Þjálfari verður Rúnar Hjálmarsson og kemur hann frá Selfossi.

Æfingarnar verða öllum sem mæta að kostnaðarlausu!

Viljum við hvetja alla sem áhuga hafa á að vera með til þess að mæta og taka þátt.

Einnig viljum við hvetja foreldra til þess að benda börnum sínum á þessar æfingar og hvetja þau til að mæta.

Hér er um að ræða góða viðbót við æfingar Garps og um að gera fyrir fyrir áhugasama að nýta sér þetta sem undirbúining fyrir HSK mótin í júní!

Nánari upplýsingar má fá hjá Halla Gísla í s. 8969539.

Aðrar sumaræfingar hjá Garpinum verða auglýstar síðar.

Stjórn Garps.

Frjálsar í sumar!

Mánudagskvöldið 30. apríl (í kvöld!) verður frjálsíþróttaæfing á Laugalandi þar sem þriðjudagurinn 1. maí er frídagur. Þar verða málin rædd fyrir sumarið svo mjög mikilvægt er að sem allra flestir krakkar OG FORELDRAR verði á ferðinni og láti sig málin varða!

Sumarkveður með sól í hjarta!

Garpur!

 

 

Sundmót HSK á Hvolsvelli 28. apríl 2012

Fjórir vaskir garpar skelltu sér á sundmót á Hvolsvelli á laugardaginn og kepptu við félög innan HSK. Garpar stóðu sig með prýði. Jóhanna  Haraldsdóttir kom heim með silfur í 100 m bringusundi og brons í 100 m skriðsundi. Yngstu garparnir stóðu sig ákaflega vel og fengu þeir þátttökuverðlaun. Dímon bauð síðan til grillveislu að móti loknu og allir ánægðir eftir skemmtilegan dag. 

 

Íþróttamenn Garps árið 2011

Á hinu árlega páskabingói foreldrafélagsins í Laugalandsskóla voru íþróttamenn Garps árið 2011 verðlaunaðir að vanda. Að þessu sinni voru veitt verðlaun í 4 flokkum auk íþróttamanns Garps. Þjálfarar í einstökum greinum völdu þá er þeim þóttu skara framúr, og fylgdi umsögn hverjum og einum. Íþróttamenn Garps að þessu sinni voru eftirtaldir.

Blakmaður: Kristín Hreinsdóttir, en félagar Kristínar í fullorðinsblaki höfðu þetta um Kristínu að segja: Kristín Hreinsdóttir er einstaklega fjölhæfur blakmaður. Hún er ef til vill besti uppspilari liðsins og svo getur hún smassað alveg svakalega. Uppgjafirnar hennar eru öruggar og erfiðar fyrir andstæðinginn og hefur hún skorað mörg dýrmæt stig fyrir liðið á þann hátt. Þrátt fyrir að vera ekki sú hávaxnasta í hópnum þá stekkur Kristín ógnandi upp í blokkeringu og truflar þannig oft andstæðinginn. Móttökurnar hennar eru mjög góðar enda er hún létt á fæti og snögg að staðsetja sig undir boltann. Kristín mætir mjög vel á æfingar, er jákvæð, hvetjandi og kát og það er alltaf gaman að spila með henni. Hún er mikill keppnismaður og leggur sig ávallt 100% fram.

 Borðtennismaður: Elvar Kristinn Benediktsson, umsögn Guðna Sighvatssonar þjálfara um Elvar var þessi: Elvar Kristinn Benediktsson er borðtennismaður Garps árið 2011. Elvar Kristinn sigraði Héraðsmót HSK í borðtennis sem haldið var á Hvolsvelli í nóvember 2011. Elvar Kristinn sigraði þar sveitunga sinn Ómar Högna Guðmarsson í flokki 12-13 ára drengja og hefur hann tekið góðum framförum í íþróttinni.

Frjálsíþróttir: Sigrún Birna P. Einarsson. Haraldur Gísli Kristjánsson frjálsíþróttamógúll Garps hafði eftirfarandi um hana að segja: Sigrún Birna stóð sig með prýði á árinu. Hún tók þátt í innanfélagamótum hér í sýslunni með góðum árangri. Hún keppti á aldursflokkamóti HSK innanhúss í janúar og náði í silfur bæði í 60 metra hlaupi og langstökki. Síðan fór hún á meistaramót Íslands innanhúss í febrúar og bætti sig þar vel og var í kringum 20. sæti í báðum þessum greinum. Hún hefur lengi verið mjög dugleg að mæta á æfingar, jafnt sumar sem vetur og verið þar til fyrirmyndar. Hún er góður félagi og í kringum hana eru aldrei nein vandamál. Hún hefur bætt sig jafnt og þétt og er nú ein besta frjálsíþróttakona HSK í sínum aldursflokki, eins og hún sannaði á HSK mótinu í janúar síðastliðnum þar sem hún fékk tvö gull og tvö silfur. Hún er því vel að viðurkenningu komin.

Glímumaður sem og Íþróttamaður Garps: Eiður Helgi Benediktsson. Kristinn Guðnason glímuþjálfari setti saman eftirfarandi upptalningu á afrekum Eiðs:

Glímumaður Garps er Eiður Helgi Benediktsson.  Eiður er drengur góður og mætir á flestar æfingar.  Hann er stæltur strákur og kemur oft krókur á móti bragði þegar hann breytir vörn í sókn og leggur viðfangsmenn sína á eigin bragði.

 Helstu afrek:

Grunnskólameistari HSK

Héraðsmeistari HSK

Grunnskólameistari GLÍ

Íslandsmeistari í sínum flokki

Allir voru þessir íþróttamenn vel að viðurkenningu komnir og óskum við þeim innilega til hamingju með árangurinn.

Frjálsíþróttamót 3. apríl!!!

Rangæingamót í frjálsum verður haldið á Hvolsvelli þriðjudaginn 3. apríl.

Keppt er í eftirfarandi flokkum og greinum:

6-7 ára, 8-9 ára og 10 ára keppa í spretthlaupi, langstökki án atrennu og skutlukasti.

Eldri flokkar upp að 10. bekk keppa í spretthlaupi, langstökki, kúluvarpi og hástökki.

Við treystum á foreldra að hjálpa okkur, það þarf að keyra krakkana og við þurfum líka einhverja sem vilja starfa, taka tíma, mæla köst eða stökkog svo framvegis.

Mikilvægt er að mæta tímanlega en keppni hefst á slaginu kl. 16.00. Gott að krakkarnir hafi tíma ti að hita upp fyrst. Að lokinni keppni er boðið upp á grillaðar pylsur og safa. Áætluð mótslok eru um kl. 18.30.

Mætum sem allra flest og skemmtum okkur með krökkunum okkar :)

Kveðja, Halli Gísli.